CEBU, Philippines – Gilangkat sa Southwestern University (SWU) ang tulo sa upat ka mga titulo nga giilogan atol sa volleyball tournament sa 2015 Cebu Schools Athletic Foundation, Inc. (CESAFI) sa miaging adlaw didto sa University of San Carlos (USC) main gym.
Mihimo sab sa labing dakung kadaugan ang SWU Lady Cobras human sila mirehistro og talagsaong double-grandslam sa kasaysayan sa CESAFI.
Ang Lady Cobras mikompleto sa usa ka sweep sa ilang 'best-of-three' finals series batok University of San Jose-Recoletos (USJ-R) 25-18, 25-20, 29-27.
Kini ang ikaduhang grandslam title sa SWU women’s human usab nila giharos ang korona niadtong 2009 , 2010 ug 2011.
Sama sa ilang women’s team, ang SWU men’s mikulit usab og impresibong kadaugan batok sa host USC, 21-25,25-20, 25-18, 25-23 sa Game-2 alang sa ilang ‘back-to-back’ title.
Mihatod usab og titulo alang sa SWU ang ilang girls team nga miharos sa Sacred Heart School-Ateneo de Cebu, 25-13, 25-16 sa Game- 2.
Sa boys division, nakuha sa USJ-R ang titulo pinaagi sa pagpilde sa USC sa Game- 2 sa ilang 'best-of-three' series. (BANAT NEWS)