CEBU, Philippines – Ang Telstra-Teletech Boomerangs milupig sa Supportsave Dragons, apan munas ginhawa niining pagkulit og makapaisag baliho nga daog, 84-83, sa Game 1 sa ilang best-of-three finals series ubos sa Evo League sa 11th CSCC E-League men's basketball tournament niadtong Sabado didto sa City Sports Club-Cebu gym.
Si Sam Jordan Hermosa mipatuasik og 28 puntos uban ang 13 ka rebounds, unom ka assists ug tulo ka blocks alang sa Telstra nga nanginahanglan na lang og usa ka daog aron hingpit nga sakmiton ang titulo ug ingon man angkonon ang katungod nga hagiton ang lottery winner sa Elite Classic.
Si Jasper Diaz midugang og 16 puntos, 10 ka rebounds ug lima ka blocks, samtang sila si John Rey Jacaban ug Jaygard Vios nagkumboya og 29 puntos agig timaan sa balanseng opensa sa Telstra.
Human milabaw og otso puntos sa unang kuwarter, 16-24, ang Telstra nabugnaw apan mipakita kini og maayong labok sa naghinapos nga bahin sa duwa aron pag-ipsot niini ngadto sa uno punto nga daog.
Si Germaine Jo Guarisma miratsada og 38 pountos, upat ka rebounds ug tulo ka steals sa Supportsave, apan wala kaugpo si Nino Belande nga nalimitahan lamang ngadto sa 17 puntos ug 13 ka rebounds. (BANAT NEWS)