CEBU, Philippines - Duha ka magkaribal nga koponan nga mihimo’g dakung kausaban sa ilang line-up ang magsangka karon sa pagbukas sa 41st season sa PBA didto sa Smart Araneta Coliseum.
Ang duwa sugdan sa alas-4 sa hapon human sa opening ceremony. Ang Painters moparada sa upat ka bag-o nilang players nga silang forward Jewel Ponferada uban ang mga rookies nga sila si No. 3 pick Maverick Ahanmishi, Don Trollano ug Josan Nimes.
Apan ang Painters adunay dili maayong balita kagahapon kay ang ilang star point guard nga si Paul Lee nahiagum og ACL injury sa tuhod ug gikabalak-an nga dugay pa makaduwa.
Sa ilang bahin, usa sa mga giatngan karon nga season ang Star nga mohimo sa ilang kampanya sa labing unang higayon nga wala ang multi-titled coach nga si Tim Cone, kinsa nibalhin na sa Barangay Ginebra San Miguel uban usab ang sinaligang forward nga si Joe Devance. (BANAT NEWS)