CEBU, Philippines - Atubangon na ni former two-division world champion Brian ‘Hawaiian Punch’ Viloria (36-4, 22KOs) ang labing lisud nga hagit diin laraw niyang palagputon gikan sa trono si Nicaraguan star Roman Gonzales (43-0, 37KOs) isip world pound-for-pound king ug WBC flyweight champion karong adlawa didto sa Madison Square Garden sa New York.
Ang sangka sa duha maoy co-feature sa Gennady Golovkin vs. David Lemieux unification title fight.
Si Viloria mokatkat sa ring nga underdog, apan bisan pa niini, ang 34-anyos nga boksidor salig sa iyang abilidad nga mohimo’g upset ug pahamtangan si Gonzales sa labing una niining kapildihan.
Sa iyang bahin, ang 28-anyos nga si Gonzales wala pa katilaw og pilde sa iyang pagdominar sa tulo ka boxing divisions -- flyweight, light flyweight ug minimumweight.
Nailhan sa iyang agresibong inawayan ug hait nga boxing skills, si Gonzales midaog sa katapusan niyang siyam ka sangka pinaagi sa knockout lakip na ang sixth round TKO batok ni ALA Boxing Gym fighter Rocky ‘Road Warrior’ Fuentes. (BANAT NEWS)