CARSON CITY, California – Mas dakung ganti ug oportunidad ang nagpaabot ni Donnie ‘Ahas’ Nietes kun ugaling molampus siya sa iyang US debut batok sa Mehikanong si Juan ‘Pinky’ Alejo duha ka adlaw gikan karon.
Kini human gikompirma ni ALA Promotions President ug CEO Michael Aldeguer nga duna na’y pasiunang sabot-sabot nga nahitabo alang sa posibleng engkuwentro tali ni Nietes ug sa bag-ohay pang gikoronahang ‘pound-for-pound’ king nga si Roman ‘Chocolatito’ Gonzalez sa Nicaragua.
“Yes, I’ve already had talks with K2 Promotions, the promoter of Gonzalez, and they are interested in a fight with Nietes. Nietes also wants the fight, and we want the fight,” sumala pa ni Aldeguer.
“But with due respect to Alejo, we are not thinking about that fight right now. Nietes will be facing Alejo this Saturday and he has to win that fight first. You’ll never know the outcome and Alejo has nothing to lose,” dugang pa niya.
Ang maong rebelasyon ni Aldeguer seguradong makapadugang sa kadasig ni Nietes sa pagdepensa unya niini sa iyang WBO light flyweight crown batok ni Alejo sa labing unang Pinoy Pride event sa Amerika karong Sabado sa gabii (Domingo sa buntag oras sa Pilipinas) dinhi sa StubHub Center.
“Mao na ang dakung away nga akong gipanglantawan sa unahan,” matud pa ni Nietes. “Apan ako sa unahon si Alejo kay kinahanglan nga modaog usa ko aning awaya.” Sama ni Nietes, si Gonzalez kinahanglan sab nga modaog sa iyang WBC flyweight title defense batok ni kanhi three-time world champion Brian Viloria, karon sab nga Sabado didto sa Madison Square Garden sa New York, aron mahatagan og katumanan ang maong matawag sab nga usa ka ‘superbout’.