CARSON CITY, California – Si two-division world champion Donnie ‘Ahas’ Nietes sa ALA Boxing Gym ug ang Mehikano niining challenger nga si Juan ‘Pinky’ Alejo magkahimamat na sa unang higayon sa ipahigayong final press conference sa makasaysaynong “Pinoy Pride 33: Philippines vs. the World” fight card karong adlawa (Biyernes sa Pilipinas) dinhi sa Carson Civic Center.
Bisan og wala kaayo sila’y kasikas batok sa usa’g-usa sukad sila niabot dinhi sa gibansagan nga Golden State, sila si Nietes (36-1-4, 21KOs) ug Alejo (21-3, 13KOs) gipaabot nga magsinukliay og mahait nga pulong tulo ka adlaw sa dili pa ang ilang away nga maoy main event sa labing unang Pinoy Pride event sa
ALA Promotions ug ABS-CBN sa Amerika karong Sabado sa gabii (Domingo sa buntag sa Pilipinas) dinhi sa StubHub Center.
Uban sa halapad niyang kasinatian, talento ug hugtanong pagbansay-bansay nga iyang gitak-op pinaagi sa huego-todo nga sparring batok sa kababayan niining si Brian Viloria, ang 33-anyos nga si Nietes masaligon kaayo nga molampos siya sa ikawalo niyang pagdepensa sa iyang WBO light flyweight title sa iyang US debut.
“I am 100% confident that I will win. This is the fight I have been waiting for a long time to fight in America and showcase my boxing skill in front of the world. My family and ALA Boxing Promotions inspire me to excel in every fight I have been to. For this fight, it is very imperative that we win so that we can give honor to our country and to our countrymen,” matud pa ni Nietes segun sa taho ni Rod Mijares sa philboxing.com.
Wa’y pilde sud sa 11 ka tuig nga nakahatag kaniya og dungog isip “longest reigning Filipino world boxing champion”, nasayod si Nietes sa gibut-an sa maong away diin nakataya ang halos tanan niyang nakab-ot sa mabulokon niyang karera.
Gawas ni Nietes, ang managsuong ‘Prince’ Albert ug Jason ‘El Niño’ Pagara ug ingon man ang umaabot nga bitoon sa ALA Stable nga si Mark ‘Magnifico’ Magsayo nagpanikad na sab nga mopakita sa ilang abilidad sa labing daku nga bantawan nga ilang katkaton sukad sila nangindahay sa boksing .
Si Albert Pagara, ang IBF Intercontinental super bantamweight champion nga wala pa’y pilde sa 24 ka away uban ang 17KOs, makigharong batok ni Nicaraguan power-hitter William Gonzales (27-5, 23KOs), samtang ang iyang maguwang nga si Jason (36-2, 22KOs), ang WBO International super lightweight titlist, makigtige batok ni Santos Benavides (25-7-2, 19KOs), nga usa sab ka Nicaraguan.
Sa iyang bahin, si Magsayo (11-0, 9KOs) manalipod sa iyang trono isip IBF Youth featherweight champion batok sa Mehikanong si Yardley Suarez (13-0, 8KOs) sa kulbahinam nga sangka tali sa duha ka batan-on ug wa’y pildeng mga bitoon. (BANAT PALARO)