CEBU, Philippines - Ang Tele-performance All-Stars, Convergys Converters ug Accenture Sharks mipalagpot sa tagsa-tagsa nila ka mga kontra aron pagmartsa ngadto sa semifinal round sa Elite Classic sa 11th CSCC E-League men’s basketball tournament niadtong Domingo didto sa City Sports Club-Cebu (CSCC) gym sa Cebu Business Park.
Ang Tele-performance sayong mipabakasyon sa ePerformax Reds sa iskor nga 82-66, ang Converters mitagak sa Wipro Tigers, 82-77, samtang ang Accenture mitagak sa SSI Warriors, 84-61.
Si Dean Junber Escalon mitali og 13 puntos, samtang si Ryan Veloso midugang og 11 puntos, siyam ka rebounds, unom ka assists ug lima ka blocks alang sa Teleperformance nga miposte og 18 puntos nga labaw sa halftime, 48-30 aron pagpukan sa ePerformax sa nahabilin nga bahin sa duwa.
Sa iyang bahin, si Sherwin Resilla miratsada og 23 puntos uban ang 16 ka rebounds, lima ka assists ug tulo ka steals sa Converters nga nagsandig sa mainit nga 20-11 rally sa ikaduhang kuwarter aron pagdominar sa Tigers.
Wala sab magpabitin si Archie Batua nga maoy nangu sa Accenture bitbit ang 16 puntos ug walo ka rebounds. Miabag kaniya si Ildefonso Bulangis Jr. nga mitali og 11 puntos.
Sa Evo League, ang Kyocera Frontiers mipasibat sa Calltek Trojans, 55-45 aron pagpuwersa og ‘best-of-three’ semifinal series batok sa Telstra-Teletech Boomerangs karong weekend. (BANAT PALARO)