CEBU, Philippines – Bisan pa sa sakit nilang kapildehan sa mga kamot sa host team China, 67-78, alang sa gold medal sa FIBA Asia Championship, si Gilas coach Tab Baldwin masaligon nga mubangon
ang iyang koponan.
Si Baldwin miingon nga gidawat nila ang ilang kapildehan bisan sa syagit sa daghang Pinoy fans nga panikas sa officiating atol sa duwa diin klaro kaayo nga gipaboran sa referee ang mga Chinese players.
Si Baldwin nasayud nang daan nga grabe kalisud ang tahas nga mudaog didto sa China atubangan sa liboan ka mga Chinese fans, apan bisan pa niini, gipakita sa iyang mga players ang kaisug ug grabeng determinasyon atol sa duwa.
“We’re blessed that we have the prayers that come to us from the Philippines, the support that comes to us from our families and the people that love us back home. I don’t feel that we let them down,” matud pa ni Baldwin sa Philstar.com.
Atol sa duwa niadtong Sabado sa gabii, nakasikit ang Gilas sa sayung bahin, 19-23, apan sunod-sunod nga turnovers ubanan pa sa bati nga tawag sa referees ang mipahinay sa opensa sa koponan.
Milabaw lang og 10 ang China, 60-50, paingun sa final period, apan didto gipakusgan sa mga Tsino ilang opensa diin wala na kabawi ang Gilas nga gipangulohan ni Andray Blatche nga adunay 17 puntos.
Ang American coach nanghinaot nga makakuha pa og dakung suporta ilabi na gikan sa PBA aron mas makapangandam pa ang national team alang sa Olympic qualifiers diin may laing kahigayunan ang Pilipinas nga mubalik sa Olympics. (BANAT NEWS)