CEBU, Philippines - Midaog na sab ang Aulga Hardware human makaipsot batok sa Blue Coast Laundry, 73-71 sa Viva Forty Christmas League 2015 basketball tournament niadtong Sabado didto sa Guadalupe Sports Complex.
Gipangulohan ni Gaga Cabanilla ang Aulga Hardware sa iyang 14 puntos, gisundan nilang Ayong Rama ug Raul Sollano nga adunay 10 puntos matag usa.
Ang naparot nga Blue Coast Laundry gipangulohan sab ni Nito Sasing ug Frank Cabusas sa ilang 20 ug 12 puntos.
Sa laing duwa, si Ciano Aliño mikamada’g 16 puntos alang sa Team Gayoso nga milubong sa Team Gallardo/Navaja sa iskor nga 64-54.
Sila si Troy Cane ug Bernard Jacaban mitampo’g 14 puntos matag usa.
Tulo sab ka players sa Gallardo/Navaja ang miiskor og double figures pinangulohan ni Sam Llevado sa iyang 20 puntos. Sila si Rene Cabarrubias ug Bihagan miambit og 11 ug 10 puntos matag usa.
Sa laing aksiyon, midaog sab ang Dayon Enterprises & Printing Press batok sa Team Capt. Gacasan, 70-68.
Ang presidente sa Viva Forty ballclub nga si Allan ‘El Presidente’ Abella maoy nangu sa Dayon Enterprises pinaagi sa iyang 14 puntos, gisundan nilang Rene Tinapay ug Mario Bihag nga parehong miantog og 10 puntos.
Si Joel Dañoso maoy topscorer sa Team Capt. Gacasan, kinsa mipabuto’g 22 puntos, samtang si Stephen Postrero mikadlit og 14 puntos.
Ang Viva Forty basketball tournament gidumala sa ilang presidente nga si Allan Glen Abella ug commissioner Dodong Elizalde. (BANAT NEWS)