CEBU, Philippines - Nag-una na karon sa South Division ang Rustan’s All-Star human modaog batok sa Pizza Hut, 66-55 sa 6th Inter-Merchant Barkadahan Basketball League (IMBBL) niadtong Sabado didto sa Urot National High School gym sa barangay Mabolo, ning dakbayan.
Sa laing duwa, gilubong sa CFG-Ayala ang Kublai Khan sa iskor nga 67-43.
Ang Rustan’s maoy pirmeng naggukod sa unang tulo ka mga kuwarter ug didto na sila nakarekober sa final period dihang ilang na-outscore ang Pizza Hut, 24-14.
Tulo ka players sa Rustan’s ug tulo sab sa Pizza Hut ang miiskor og double figures aron pangulohan ang opensa sa ilang tagsa-tagsa ka koponan.
Sa laing bahin, sila si Jingle Arias ug Jaymar Dosdos maoy nangu sa CFG samtang bugtong si Janno Caballes lang ang player sa Kublai Khan ang mihimo’g double figures. (BANAT NEWS)