CEBU, Philippines - Human sa 14 ka bulan nga pahuway, ang wa’y pildeng Pinoy featherweight prospect nga si Dodie Boy Peñalosa Jr. (13-0, 12KOs) mokatkat og balik sa ring aron sangkaon ang beteranong si Stephon McIntyre sa Amerika sud sa unom ka hugna ubos sa super bantamweight division karong adlawa didto sa Norfolk Masonic Temple sa Norfolk, Virginia.
Ang anak ni kanhi two-division world champion Dodie Boy Peñalosa ug pag-umangkon ni two-division world champ Gerry Peñalosa katapusang miaway niadtong Hulyo 26, 2014 diin midaog siya pinaagi sa 3rd round knockout batok ni Dicky Amritan sa Mandaluyong Sports Complex aron pag-inat sa nagkadina niyang daog ngadto sa 13.
Nanghinaut si Peñalosa nga mopakli og laing panid sa iyang karera ubos sa pagduma sa bag-o niyang manedyer nga si Cameron Dunkin, kinsa mao sab ang nagkupot ni four-division world champion Nonito ‘The Filipino Flash’ Donaire Jr.
Si Dodie Boy Jr. ug ang manghod niyang si Dave bag-ohay pang mipirma og kontrata uban sa Cameron Dunkin Management. (BANAT NEWS)