CEBU, Philippines – Nakaginhawa pa ang University of San Jose-Recoletos Jaguars ug usa na lang ka daog moabante na sila sa semifinals human sila mokulit og 88-81 nga kadaugan batok sa University of Southern Philippines Foundation Panthers sa 15th Cebu Schools Athletic Foundation, Inc. (CESAFI ) kagabii didto sa Cebu Coliseum.
Wala unta bentahai sa opensa ug sa depensa ang Panthers, apan mas daghan sila’g turnovers nga nahimong basket alang sa Jaguars.
Si Juan Miguel Gastador maoy nangu sa Jaguars pinaagi sa iyang 22 puntos lakip ang tulo ka three-pointers aron mahimong best player of the ballgame.
Mihimo sab siya’g siyam ka rebounds, duha ka assists, tulo ka steals ug usa ka blockshot.
Nakakuha sab siya og igong suporta gikan ni Ralph Dinolan, kinsa midugang og 15 puntos.
Ang Panthers kinsa kanunay makasikit ngadto sa tres puntos sa halos kinatibuk-ang duwa, gipangulohan ni Brandford Borces sa iyang 18 puntos, gisundan ni Jawein Ceniza nga adunay 17 puntos.
Si Kino Matthews Bajamunde mitampo’g 10 puntos alang sa Panthers nga wala gyud makatilaw og daog sa 12 ka duwa
Samtang ning pagsuwat, padayon pang nagsangka ang University of San Carlos Warriors (9-2) batok sa University of Cebu Webmasters (4-6).
Kinahanglan sab sa Warriors nga modaog aron mobalik sa solong liderato, samtang ang Webmasters naglaraw og ‘upset’ aron sab mabuhi ang ilang paglaum nga moabante sa semifinals. (BANAT NEWS)