CEBU, Philippines – Mosalida na sab karon ang University of San Jose -Recoletos ug ang University of Cebu Webmasters diin ilang suwayan pagsakmit ang ikaupat nga luna sa semifinals batok sa tagsa-tagsa nilang kaatbang sa 15th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.
Ang Jaguars daku’g purohan nga modaog karon sa ilang sangka batok sa wa’y daog nga University of Southern Philippines Foundation Panthers sa pasiunang duwa sa alas-5:15 sa hapon, samtang ang Webmasters mag-atubang og mas lisud nga hagit batok sa University of San Carlos Warriors sa ilang sangka sa alas-6:45 sa gabii.
Ang Jaguars ug ang Webmasters parehong nagbitbit og 4-6 nga baraha ug hugot ang ilang tinguha alang sa ikaupat ug katapusang luna sa semis.
Sa pagka karon, ang Jaguars magsalig gihapon nilang Kevin Villafranca, Mark Labares, Ralph Dinolan, Nelvin Navarra ug Juan Miguel Gastador, Jaybie Mantila ug Ricky Peromingan, samtang ang Panthers nga natagak na sa ilang 0-11 baraha maghangad nilang Kino Matthews Bajamunde, Brandford Borces, Roy Quiachon, Charles Avancena ug Winston Bolivar
Sa laing bahin, ang Webmasters maglaum sab sa abilidad nilang Melvin Butohan, Garciano Puerto. Justin Dacalos, Clint Suelto ug pipila sa ilang mga sinaligan.
Medyo mas bug-at gyud ang ilang kontra nga Warriors tungod sa import niining si Shooster Olago nga mangulo sa opensa uban sa mga sinaligan nga naglakip nilang Ian Tagapan, Charles Pepito, Nico Magat, Kiefer Lim ug Ian Ortega. (BANAT NEWS)