CEBU, Philippines – Nanganti si Gilas Pilipinas coach Tab Baldwin nga haruson nila ang tanan nilang kontra sa group stage atol sa pagsugod sa FIBA Asia Championship sa Miyerkules didto sa Changsa, China.
Si Baldwin miingon nga salig siya tungod kay huyang ang ilang mga kontra sa preliminary round, apan iya gihapon nga gitambagan iyang mga batos nga dili mokompiyansa.
“The reality is, without in any way sounding arrogant, we understand that the first pool that we have is not the top teams in Asia. The horror story would be if we get complacent, relax and treat those as scrimmages,” matud pa ni Baldwin sa Philstar.com.
Ang Gilas musugod sa ilang kampaniya sa FIBA Asia batok sa Palestine, sundan sa Hong Kong sa Huwebes ug Kuwait sa Biyernes.
Ang Gilas nabutang sa Group B og kun mag-una sila sa maong grupo, moduwa sila sa sunod round batok sa top three sa Group A nga gilangkuban sa mas lisud na nga mga kaatbang nga naglakip sa Japan ug power-house Iran.
Ang top four sa maong round musulod sa knockout stage diin posibleng magpaabot sa Gilas ang uban pang elite teams sama sa China, South Korea, Chinese Taipei ug Kazakhstan. (BANAT NEWS)