CEBU, Philippines - Miabot ngadto sa 500 ka mga dance athletes gikan sa naglain-laing nasud sa kalibotan ang morampa sa pagsikad sa Cebu WDSF DanceSport Open ug ingon man ang 8th DanceSport sa Sugbo karong adlawa diha sa Waterfront Cebu City Hotel and Casino sa Barangay Lahug, dakbayan sa Sugbo.
Matud pa ni Cebu City Sports Commission (CCSC) chairman Edward Hayco nga mao kini ang labing daghan nga partisipante nga ilang nahakop sukad sila mipasiugda sa maong indigay sa sayaw walo ka tuig na ang milabay. Mosamot pa gani unta og kadaghan ang mga entrante kun ang Dancesport-Team Cebu City wala pa mipahigayon og eliminasyon alang sa Dancesport sa Sugbo.
Gawas sa mga batan-ong atleta sa Sugbo, ang maong torneyo nakadani sab og ubay-ubay nga langyaw’ng partisipante nga gipangulohan nilang Edgar Borjas ug Alina Nowak gikan sa Espanya. Ang ubang mga delegado nagagikan sa Australia, Malaysia,Poland, Netherlands ug Hong Kong.
Mga pambato sa Sugbo mao sila si Pearl Caneda ug Wilbert Aunzo ug ingon man silang Ansel Estellore ug Mary Desiree Seraga nga mosadsad sa open division.
Modugang og kasadya sa kalihukan mao ang dancesport competition sa Cebu Schools Athletic Foundation, Inc. (CESAFI) nga giapil sa labing unang higayon sa maong prestihiyosong event.