CEBU, Philippines – Gidayeg og maayo ni American coach Tab Baldwin ang iyang mga players sa Gilas Pilipinas tungod sa grabeng sakripisyo nga gipakita niini aron lang makahatag og dungog sa nasud nga Pilipinhon.
Si Baldwin uban ang tibuok koponan sa Gilas miatubang sa mga sakop sa Cebu media kagahapon human sa ilang ensayo didto sa Hoopsdome sa Brgy. Gun-ob, dakbayan sa Lapu-Lapu.
Miangkon si Baldwin nga lisud nga hagit ang giatubang sa Gilas sa FIBA Asia Championship didto sa China nga sugdan karong Septiyembre 23, apan mibati siya og kompiyansa tungod sab sa gipakitang kadasig sa iyang mga players.
Atol sa team practice, ang mga Gilas players mibaid sa ilang mga offensive ug defensive plays nga maoy ilang gamiton batok sa mga karibal nilang Asian teams.
Gawas sa pisikal nga kakapoy, bilib sab si Baldwin sa sakripisyo sa mga players nga misugot nga malayo sa ilang pamilya.
“This is tough for them to be away from their family,. It seems exciting but the reality is that its tough for them (Gilas players),” matud pa ni Baldwin. “Their sacrifice will not be put to waste. We will be ready the challenges ahead (of FIBA Asia).”
Sa ilang bahin, ang mga beterano sa Gilas nga sila si Asi Taulava ug Dondon Hontiveros miingon nga mas salig siya sa national team karon tungod sa lig-on nilang relasyon sa matag usa nga daw og pamilya. (BANAT NEWS)