CEBU, Philippines – Ania karon dinhi sa Sugbo ang Gilas Pilipinas diin anhi nila tapuson ang ilang training camp diha sa Hoops Dome sa dakbayan sa Lapu-Lapu.
Ang Gilas manukad sa Sugbo sa dili pa sila mosulong didto sa China alang sa lisud nilang misyon nga FIBA Asia Championship karong Septiyembre 23.
Ang FIBA Asia maoy qualifier alang sa 2016 Olympics.
Gituyo sa Gilas nga anhi sa Sugbo tapuson ang ilang ensayo tungod sa kasamok ug trapik didto sa kaulohan.
Ang Gilas moistar dinhi sa Sugbo sud sa lima ka adlaw ug sa sunod Lunes na sila mobiya sa nasud paingon sa China.
Gawas sa Final 12, mouban usab sa national team ang duha ka reserve nga sila si Troy Rosario ug Gary David.
“We’re not planning to make change, but we’re prepared to make change when necessary,” matud pa ni Gilas coach Tab Baldwin sa Philstar.com.
Paninguhaon sa Gilas nga modaog sa FIBA Asia aron moabante sa Olympics nga katapusang naduwaan sa Pilipinas niadto pang tuig 1972 sa Munich Olympics. (BANAT NEWS)