CEBU, Philippines – Ang managsuong ‘Prince’ Albert (24-0, 17KOs) ug Jason ‘El Niño’ Pagara (36-3, 22KOs) ug si Mark ‘Magnifico’ Magsayo (11-0, 9KOs) molarga na padung sa Amerika karong adlawa bitbit ang dugang bagahi nga makasugakod sa labing daku nga hagit sa ilang karera dili lamang alang sa personal nilang dungog apan alang sab sa garbo sa nasud.
Kini gumikan kay gikatakda man silang moaway sa labing unang Pinoy Pride event sa ALA Promotions ug ABS-CBN didto sa Amerika nga giulohan og “Philippines vs. the World” karong Oktubre 17 didto sa StubHub Center sa Carson City, California.
“Ako kanunay gisulti kanila nga stay focus sa ilang training ug kinahanglan doblehon ang ilang sakripisyo ug dedication para makab-ot nila ang ilang
damgo nga world champion ug ingon man mahimo silang idolo sa mga bata nga nangambisyon nga mahisama kanila,” matud pa ni Edito Villamor, nga maoy mogiya sa mga boksidor sa ALA Stable sa pagpadayon nila sa ilang pagbansay-bansay didto sa Wild Card gym ni Freddie Roach sa Los Angeles.
Si ALA Promotions President ug CEO Michael P. Aldeguer nagkanayon nga ila pang gipinalisar sa pagka karon ang mga kontra sa iyang mga boksingero, apan ang managsuong Pagara nagkanayon nga andam silang makigharong bisan og kinsa ang kontra nga itupo kanila.
“Kining awaya daku gyud ni ug dili ni para nako ug sa akong pamilya kun dili hasta sab sa atong nasud. Akong ikapasalig nga nindot gyud ning dulaa”, matud pa ni Jason Pagara, ang kasamtangang WBO International light welterweight champion.
Ang iyang manghod nga si Albert, ang wa’y pildeng IBF Intercontinental super bantamweight champion, nagpanikad na sab nga motaak ug ingon man moaway sa Amerika sa labing unang higayon.
“Wala ko mapresyur aning duwaa kay taas kaayo ang akong confidence sa akong kaugalingon. Nanghinaut lang ko nga padayon ang suporta sa among mga fans ug modaog unta ko aning awaya,” dason pa ni Albert.
Si two-division world champion Donnie ‘Ahas’ Nietes (36-1-4, 21KOs) maoy mowadwad sa main event sa maong makasaysayanong promosyon diin siya modepensa sa iyang WBO ug The Ring light flyweight title batok sa Mehikanong si Juan ‘Pinky’ Alejo (21-3, 13KOs). (BANAT NEWS)