CEBU, Philippines - Gikan sa ‘Filipinos Contra Latinos’, ang labing unang Pinoy Pride event sa Amerika pagatawgon na og “Philippines vs. the World”.
Ang maong makasaysayanong boxing card mahitabo didto sa StubHub Center sa Carson City, California karong Oktubre 17.
“With the encouraging reception the event has been getting, we are working to involve and cater a wider scope of audience, involving more countries and working for a bigger show as we make our debut in the boxing mecca of the world. We are formally announcing the updated Pinoy Pride 33 event title, ‘Philippines vs the World’,” matud pa sa ALA Promotions sa usa ka opisyal nga pamahayag.
Mopakita’g aksiyon sa main event mao si two-division world champion Donnie ‘Ahas’ Nietes (36-1-4, 21KOs), nga modepensa sa iyang WBO light flyweight title batok sa Mehikanong si Juan ‘Pinky’ Alejo (21-3, 13KOs).
Si Alejo wa’y pilde sukad pa niadtong Disyembre 2009.
Mirehistro siya og 21 ka sunod-sunod nga daog sa maong pagratsada nga milanat og dul-an na sa unom ka tuig.
Seguradong kulbahinam gyud ang maong sangka gumikan kay si Nietes wala pa man sab mapilde sa milabay’ng 11 ka tuig. Pabilin siyang nanginit human gilangkat ang WBO minimumweight title pinaagi sa pagbuntog ni Thai Pornsawan Porpramook niadtong Septiyembre 30, 2007 diha sa Waterfront-Cebu City Hotel and Casino nga maoy naghimo kaniya nga ‘longest reigning Filipino world boxing champion’.
Gawas ni Nietes, ang managsuong ‘Prince’ Albert ug Jason ‘El Niño’ Pagara ug ingon man ang sumosulbong nga bitoon sa ALA Stable nga si Mark ‘Magnifico” Magsayo mopakita sab sa ilang abilidad sa maong makasaysayanong fightcard sa ALA Promotions ug ABS-CBN didto sa Amerika.
Silang tanan molarga sa Amerika sa sunod semana aron padayonon ang ilang pagbansay-bansay didto sa Wild Card Gym ni Freddie Roach sa Los Angeles. (BANAT NEWS)