CEBU, Philippines - Ang dakbayan sa Sugbo maoy mo-host sa 2015 National Duathlon Championships nga gikatakda karong Septiyembre 12-13 diha sa South Road Properties.
Ang unang adlaw itagana alang sa indibidwal nga kumbati, samtang ang ikaduha ug katapusang adlaw alang sa inter-club competition.
Naglangkob sa individual event mao ang SuperTriKids, elite, junior elite, mga age-groupers sa standard distance ug ang open mini sprint.
Kadtong mga interesado mosalmot mahimong magparehistro sa Rudy Project (SM City-Cebu ug Ayala), Lantaw SRP, Bikecology sa Banilad Town Center, Dan’s Bike Shop ug RUNNR sa Ayala.
Ang registration nagkantidad og P2,500 sa standard, P2,000 sa sprint ug mini sprint ug P1,000 sa STK nga kutob lamang karong Septiyembre 6. Ang Inter-Club registration mosira karon nang Septiyembre 1.
Ang duha ka adlaw nga karera giorganisar sa Triathlon Association of the Philippines (TRAP) ug Danao City Sports Commission inabagan sa kagamhanan sa dakbayan sa Sugbo ubos sa liderato ni Mayor Mike Rama. (BANAT PALARO)