CEBU, Philippines – Giputol sa RDAK Transporters ang nagkutay nga daog sa Dynamic Power pinaagi sa pag-iskor og 55-45 sa Division B sa 20th SHABAA Cup basketball tournament niadtong Domingo didto sa SHS-AdC Canduman campus sa Brgy. Canduman, Mandaue City.
Ang Transporters, kinsa mao na karon ang nag-una sa Division B, gipangulohan ni Jose Rey Reoma sa iyang 11 puntos, samtang ang 5-1 nga Dynamic Power gipangulohan sab ni Roderick Mangubat sa iyang 10 puntos.
Sa laing duwa sa Division B, ang Autolab midaog batok sa White Gold Club, 63-55 aron moabante sa ikatulong puwesto.
Ang 3-3 nga Autolab gipangulohan ni Jed Huang sa iyang 22 puntos, samtang si Sergs Goboi midugang og 16 puntos. Ang 1-5 nga White Gold gipangulohan nilang Romeo Alejandro ug Teddy Lee kinsa miburak og 21 ug 14 puntos matag usa.
Sa Division A, wala gihapon mabulingi ang rekord sa Petron Goldberry, kinsa midemolis sa Filmon Prince Medallion sa iskor nga 71-34, samtang ang RDAK Stallions milubong sab sa Gaisano Capital sa iskor, 80-54.
Si Paulsen Uy mipupo og 20 puntos aron pangulohan ang Petron Goldberry nga nagbitbit og 5-0 nga baraha, gisundan ni Leigh Dixon sa iyang 10 puntos.
Ang Filmon Prince Medallion gipangulohan ni Vince Capistrano nga mihimo’g nuybe puntos.
Sa laing duwa sa Division A, ang Cebu Landmasters milubong sa Chick@Phil Basic, 80-37.
Tulo ka players sa 4-1 nga Stallions ang mibahog og double figures nga gipangulohan ni Jair Igna sa iyang 18 puntos.
Ang Gaisano Capital gipangulohan ni Arc Gabrielle Araw-Araw nga mipabuhagay og 27 puntos. (BANAT NEWS)