CEBU, Philippines – Ang Gaisano Capital mikulit sa ikatulo nilang daog human ilang gidemolis ang Filmon Prince Medallion, 64-40 sa Division A sa 20th SHAABAA Cup basketball tournament niadtong Domingo didto sa SHS- Ateneo de Cebu old campus gym sa Gen. Maxilom Ave., Cebu City.
Sa laing duwa sa Division A, ang Cebu Landmasters midemolis sab sa Bayfront Hotel Cebu, 64-52.
Ang 3-1 nga Gaisano Capital gipangulohan sa managsuong Niño ug Arc Gabrielle Araw-araw nga nagkumboya’g 16 puntos. Ang Prince Medallion gipangulohan sab nilang Jonathan Cimafranca ug Chino Chy nga mihimo’g 16 ug 11 puntos matag usa. Sa laing bahin, ang Cebu Landmasters nga adunay 2-2 nga baraha, gipangulohan ni Jessieneth Wahing, kinsa miposa’g 17 puntos, samtang si Daryl Tan midugang og 12 puntos.
Bugtong si Elmer Cabahug lang maoy nihimo’g double figures sa 1-3 nga Bayfront sa iyang 11 puntos. Sa Division B, ang White Gold Club miiskor sa labing una nilang daog pinaagi sa pagpukan sa Caltex Delo, 55-50. Ang 3-1 nga White Gold Club gipangulohan ni Romeo Alejandro, kinsa miburak og 23 puntos, samtang si Benedict Benedicto mao sab ang nangu sa Caltex Delo sa iyang 16 puntos, sila si Chris Aldeguer ug Glenn Sevilla mitampo’g 13 ug 12 puntos matag usa. Midaog sab ang Dynamic Power batok sa Filmon Finishing Studio. Ang 4-0 nga Dynamic Power gipangulohan ni Mark Ong sa iyang 16 puntos, samtang ang Finishing Studio gipangulohan ni Aldie Canizares sa iyang 12 puntos. (BANAT NEWS)