CEBU, Philippines - Nangigo sa iyang outside shooting si Ramesh Alforque, samtang walay nakapiog ni Raul ‘Jancork’ Cabahug sa ilawom aron pangulohan ang opensa sa University of the Visayas Baby Lancers nga miihaw sa Don Bosco Technology Center Junior Greywolves kagabii sa 15th Cebu Schools Athletic Foundation, Inc. (CESAFI) didto sa Cebu Coliseum.
Ang Baby Lancers daw nga nagduwa-duwa lang ngadto sa mas gagmay nga Junior Greywolves ug ilang gitapos ang halftime sa iskor nga 30-13. Mitubo pa kini ngadto sa 58-22 dihang ila lang gipaiskor og nuybe puntos ang Junior Greywolves sa third period.
Si Cabahug wala na hatagi’g taas nga playing time sa fourth quarter nga maayo kaayong midaro sa iyang mga gagmay nga defender. Si Cabahug mihimo’g 12 puntos, apan si Alforque maoy topscorer pinaagi sa iyang 15 puntos lakip ang back-to-back triples sa nahabiling kuwatro minutos sa duwa.
Miabot ang labaw sa Baby Lancers ngadto sa 40 puntos, 74-34 sa nahabiling kapin sa usa ka minuto sa duwa.
Si Vince Lennard Macam mao lang ang bugtong nakahimo’g double figures alang sa Junior Greywolves sa iyang 14 puntos .
Gisakdapan lang sa Baby Lancers ang mga gagmay kaayong point guards sa Junior Greywolves nga naglakip ni Allen Ciabo, anak ni assistant coach Arnaldo Ciabo. (BANAT PALARO)