CEBU, Philippines – Ang mga Sugbuanong spikers nga gipangulohan nilang Danika Gendrauli ug Jade Becaldo misidlak sa tagsa-tagsa nila ka mga kategoriya sa labing unang Philippine Super Liga-Beach Volleyball Challenge Cup sa miaging adlaw didto sa Sands SM By The Bay sa kaulohan
Si Gendrauli, kanhi collegiate star sa Southwestern University ug si Norie Jane Diaz nga maoy nagtimon sa Team Giligans nakabangon human mahagba sa unang set aron pagpakgang sa Foton Tornadoes nilang Patty Orendain ug Fiola Ceballos sud sa tulo ka sets, 19-21, 21-14, 15-11 dayon na ngadto sa paglangkat sa korona sa women’s division.
Human gitak-op ang eliminasyon bitbit ang 2-1 win-loss record, sila si Gendrauli ug Diaz mipukan nilang Len Cortel ug Samantha Dawson sa Team Army aron pag-abante ngadto sa semis. Ila dayon nga gipakaging ang Cignal Team B nilang Wensh Tiu ug Rose Hingpit aron moabante sa finals batok sa Foton Tornadoes.
Pipila ka minuto ang milabay, ang kanhi pambato sa University of the Visayas nga si Becaldo mao na sab ang misalida. Si Becaldo ug si Hachaliah Gilbuena nga maoy nagdala sa SM By the Bay A maoy nanghawod sa men’s category human gilupig ang Sugbuanon sab nga si Tippy Tipgos ug ang iyang pares nga si Marjun Alingasa sa Team Champion Infinity B sud sa duha ka sets, 21-19, 24-22. (BANAT NEWS)