CEBU, Philippines – Milampos si Junny Salogaol sa Big Yellow Stable sa pagdepensa sa ilang PBF bantamweight title pinaagi sa third round knockout nga kadaugan batok sa bisitang si Nicong Calamba gikan sa Agusan del Norte sa main event sa “Binukbokay sa Minglanilla: War of the Fists” boxing card niadtong Sabado sa gabii didto sa Minglanilla Sports Complex. Human magsinukliay og mga kumo sa unang duha ka rounds, si Salogaol kalit lang nga mipatama og solidong suntok ngadto sa suwang nga nakapatumba ni Calamba sa 1:04 sa third round.
Si Salogaol pabiling wala’y pilde sa iyang siyam ka professional fights diin ang tanan niyang daog pulos pinaagi sa knockout.
Sa supporting main event, si Jerry Castroverde sa Omega Stable midaog pinaagi sa controversial split decision batok ni Ryan Quimbo sa Compostela sa walo ka hugna nilang away.
Wala makauyon ang mga boxing fans sa nahimong desisyon tungod kay sa ilang pagtan-aw, si Quimbo maoy midaog.
Si Quimbo maoy mas daghang gibuhian og mga kinumo sa ikaunom ug ikapito nga rounds, apan si Castroverde mibawos sa ikawalo.
Sa laing aksiyon, si RR Borbon mikulit sa labing sayo nga kadaugan niadtong gabhiona pinaagi sa technical knockout batok ni Jomar Ceniza sa Bohol paghuman sa first round.
Si Clyde Azarcon sa Big Yellow Stable midaog sab batok ni Macmac Baribar pinaagi sa majority decision, samtang si Jay-Ar Aliasot nidaog pinaagi sa technical decision batok ni Ritchneil Rosales.
Ang maong fight card nahimong posible pinaagi sa suporta ni Minglanilla Mayor Lani Pena sa pakig-alayon uban sa Cebuano sports promoter Lorenzo ‘Chao’ Sy ug sa Barangay Councilor League of Philippines-Minglanilla Chapter. (BANAT NEWS)