CEBU, Philippines - Tumong sa University of San Carlos Warriors nga makigsawo sa liderato, samtang ang Southwestern University Cobras motilaw sa ilang unang daog batok sa tagsa-tagsa nilang kaatbang karong adlawa sa 15th Cebu Schools Athletic Foundation, Inc. (CESAFI) basketball tournament diha sa Cebu Coliseum.
Ang Warriors nga nagtinguhang mokulit sa ilang ikaduhang daog makigsangka sa University of Cebu Webmasters sa alas-4 sa hapon, samtang ang Cobras moharong sa Cebu Institute of Technology-University Wildcats sa main game sa alas-5:30 sa hapon.
Sa juniors division, tinguha sa Cebu Eastern College Dragons ug University of the Visayas Baby Lancers nga mokulit sa ilang ikaduhang daog diin mas paborito sila batok sa ilang tagsa-tagsa ka karibal.
Ang Dragons moharong sa labing huyang nga Don Bosco Technology Center Junior Greywolves sa ala-1 sa hapon, samtang ang Baby Lancers makigsangka batok sa University of San Jose- Recoletos Baby Jaguars sa alas-2:30 sa hapon.