CEBU, Philippines - Dul-an sa usa ka gatos ka mga koponan ang mopakita’g aksiyon sa labing unang Univille Homes Football Festival nga mosikad na karong alas 7:30 sa buntag diha sa Cebu City Sports Center (CCSC).
Mosidlak man ang haring adlaw o mobundak man ang ulan, magpadayon
ang kumbati segun sa nalatid sa iskedyul puwera na lang
kun dili na gyud mahimong kaduwaan ang binyu.
Ang mga kategoriya nga banatan karon mao ang under-7, 9, 11 ug 13.
Ang boys ug girls 15 ug 18-under subhan ugma pang adlawa.
Ang mga entrante ning torneyo nga gipaluyohan sa Cebu Football Association (CFA) magsubay og 7-a-side format.
Gawas sa mga duwa, gihan-ay sab sa mga organizers ang makalingaw nga side events sama sa shooting accuracy ug cross-bar challenge.
Mopadagan niini mao si Voltaire Montebon, kanhi football player nga usa na karon ka triathlete.
Gani usa siya sa mga finishers sa makutas nga Cobra Energy Drink Ironman 70.3. Philippines dili pa lamang dugay.