Mubo ra kaayo ang iyang mensahe nga sa akong kwentada wala gani molanat og diyes minutos. Apan undanon kini. Bisan kinsa seguro modayeg sa gisabwag nga mensahe ni PBA commissioner Chito Narvasa atol sa pormal nga pagbukas sa 15th CESAFI (Cebu Shools Athletic Foundation, Inc.) season diin siya maoy pinasidunggang dinapit niadtong Sabado didto sa Cebu Coliseum.
Human gidayeg ang CESAFI isip usa ka lig-on nga liga nga nabaniog na bisan gani didto sa kaulohan, nasentro ang iyang pagpamulong atubangan sa liboan ka mga Sugbuanong atleta mao ang bili sa edukasyon. Wa’y duda sa huna-huna ni Narvasa nga usa kanila malandig gyud sa propesyonal nga liga sama sa PBA ugma damlag.
Apan gipadayag ni Narvasa nga ang kinabuhi sa usa ka PBA player molanat lamang og mga 10 ka tuig depende sa kahimtang sa panglawas niini kay duna man gani kutob lang sa usa o duha ka seasons gumikan kay na-injury.
Mao nang samtang iyang gidasig ang mga atleta nga kab-uton ang ilang mga damgo, iya sab silang gipahimangnoan nga hatagan og importansiya ang ilang pagtuon. Alang ni Narvasa, ang edukasyon usa ka butang nga makahatag kanila og daghan nga opurtunidad.
Sa iyang panglantaw, ang edukasyon usa ka maanindot nga pamaagi sa pagpundar alang sa maayong ugma. Matud pa ni Narvasa nga kun ang usa ka atleta magpundar og maayo sa iyang pagtungha karon, sama ra sab siya nga nagpundar og maayo sa iyang kaugalingon sa tibuok niyang kinabuhi.
Pagkanindot sud-ungon sa matag litok sa pulong ni Narvasa. Mao nang suwerte gyud tang mga Sugbuanon ilabi na kadtong mga atleta nga nakadungog sa bulawanong mensahe gikan ni Narvasa sa labing una pa gyud nga adlaw nga siya opisyal milingkod isip commissioner sa PBA.
* * *
Gawas ni Narvasa, mitambong sab sa maong kalihukan ang garbo natong mga Sugbuanon sa natad sa basketbol nga si JuneMar Fajardo, ang tinamod nga ‘Gentle Giant’ gikan sa lungsod sa Pinamungajan, habagatang bahin sa Sugbo.
Sa dihang akong nahinabi, pila lang sab ka lugas ang iyang mga pulong, apan napuno kini sa pagtulon-an. Sa dihang akong gipangutana kun unsay iyang ikatambag sa mga sumusulbong pang talento sa CESAFI, simple lang ang tubag sa two-time PBA MVP, praktis lang og maayo.
Matud pa ni Fajardo kanang dili klase sa praktis nga ang usa ka player moadto lamang aron mo ‘show-up’ . Kana pang magpabilib lamang sa iyang abilidad. Ang labing maayo alang ni Fajardo kanang moadto sa praktis aron dunay makat-onan bisan gamay unsaon pagbaid sa iyang abilidad. Pasabot pang Fajardo nga bisan og ginagmay lang walay kaso kay kun tigumon nimo kanang gagmay modaku ra man na sa madugay.
Sa ilang gipanulti, makaingon gyud ko og bulahan ka Fajardo ug saludo ko nimo commissioner Narvasa.
Kun dunay mga komentaryo o reaksiyon, mahimong mo-email sa mannix_80@yahoo.com.