CEBU, Philippines - Gawas sa individual competition, kulbahinam sab nga aksiyon ang masaksihan sa relay event sa giatngan nga 2015 Cobra Ironman 70.3 Philippines karong Domingo diha sa Shangri-La’s Mactan Resort and Spa, Lapu-Lapu City.
Sa tanan nga mga entrante, ang RDAK mao ang dunay labing lig-on nga mga koponan bisan pa man og ang duha nila ka haligi, ang managsuong Regan ug Rere King dili makasalmot ning higayona tungod sa ka-busy sa ilang trabaho.
Sa labing unang higayon sukad ang Sugbo mi-host sa maong half Ironman, ang RDAK mopadala sab og all-female team diin ang igsuon nilang Regan nga si Ross Rica Deen maoy modagan uban nilang swimming coach Ivy Suarez ug national cycling team member Avegail Rombaon.
Kahintapan sab ang RDAK sa all-male ug mixed relay.
Sa all-male category, ang pambato sa RDAK mao sila si World Mountainbike Championship campaigner Niño Surban, swimming coach Ray Suerte ug USPF varsity runner Prince Joey Lee.
Sa mixed relay, ang RDAK magsandig nilang open water champion Loren Dale Echavez, national cyclist John Renee Mier ug Kenyan runner Isaac Simat.
Gipaneguro sa RDAK nga makaporma og dekalibreng koponan sa mixed relay kay nagtinguha man sila nga langkatan og korona ang defending champion La Europa, nga dili sab kabintahaan kay gibitoonan kini og tulo ka kampiyon nga silang swimmer Keith Ashley Ocampo, Ronda Pilipinas champion Barnachea ug si Mary Joy Tabal nga marathon record-holder sa nasud.
Miabot ngadto sa 91 ka mga koponan ang magsangka sa mixed relay, 20 sa all-female ug 70 sa all-male. (BANAT PALARO)