CEBU, Philippines - Ang 16th Santa Fe Beach Games mo-arangkada na karong adlawa didto sa Sugar Beach Resort sa Santa Fe isla sa Bantayan.
Ang maong masadya nga kalihukan nga gipasiugdahan sa Go Active Marketing and Event (GAME) nag-langkob og twilight beach run, beach soccer, open water swim, oceanman ug banca competition.
Ang beach soccer nga kumbatihan karon uban sa twilight run, magsubay og 5-a-side format.
Napulo’g lima ka teams ang magsangka. Matag koponan adunay 10 ka miyembro sagol ang babaye ug lalaki. Samtang ang twilight beach run lima ka kilometro nga karera.
Ugmang adlawa banatan ang 5K open water swim, samtang ang oceanman gikatakda sa Black Saturday.
Mas mamahimo pang bibo unya ang Domingo sa Pagkabanhaw kay ipahigayon ang lumba sa mga baroto. (BANAT NEWS)