CEBU, Philippines – Andam na ang tanan alang sa pagpahigayon sa Power Dealer Basketball Club (PDBC) Summer League Inter-company tournament nga gikatakdang sugdan karong Marso 25 diha sa Kimwa gym sa Brgy. Subangdaku, Mandaue City.
Ning higayona, ang numero sa mga entrante gikan sa walo ngadto na sa 13 ka teams.
Lakip sa mopakita’g aksiyon mao ang Shemberg 1, Shemberg 2, Jetti, Saymer Merchandise, Ford, Galilio, Natasha, Reliance, Palawan, PNP, Julius Team, Toyota ug Soccor.
Ang mga partisipanteng koponan buwagon ngadto sa duha ka bracket -- A ug B.
Apan si PDBC founder Arnold de Asis miingon nga ugma pa mahibaw-an kun asa nga bracket mapunta ang mga teams kay ipaagi man kini’g bunot-bunot.
Mosubay kini og single round robin format sa eliminasyon diin ang top two sa matag bracket moduwa sa crossover semifinals. Ang modaog maoy magsangka alang sa kampiyonato.
Ang mga duwa pagadumalaon ni league organizer Alner Mercado ubos sa pagtugot sa ilang presidente nga si Florentino Sayson. (BANAT NEWS)