CEBU, Philippines – Tuyo sa Barangay Ginebra San Miguel nga mokulit sa ilang ikatulong sunod-sunod nga daog nga mopadaku sa kahigayonan nila nga maangkon ang automatic semis berth sa PBA Commissioner’s Cup.
Ang Ginebra makigharong sa NLEX Road Warriors karong alas-7 sa gabii, human sa duwa tali sa Alaska Aces ug Blackwater Elite nga sugdan sa alas-4 sa hapon didto sa Ynares Center.
Ang Ginebra sakto sa pahuway human sa All-Star Games ug andam sila nga ipadayon ilang maayong performance sa pagpangulo ni All-Star center Greg Slaughter. Gipaabot pa usab karon kun moduwa ba ang ilang tirador nga si Mark Caguioa.
Si Caguioa wala miduwa sa All-Star human makahiagum og injury.
Gawas ni Slaughter, mobida sab sa Ginebra mao sila si import Michael Dunnigan, laing All-Star nga si LA Tenorio ug Joseph Yeo.
Ang kadaugan sa Ginebra (4-3) motukmod kanila sa ikaupat nga dapit sa standing uban ang Purefoods Star Hotshots. (BANAT NEWS)