CEBU, Philippines - Ang 2GO/Beryong mao gyud ang nakasulod sa finals dihang ilang gitagak ang DHL/Nonoy sa taktakay nilang duwa sa second season Vendredi Ballclub basketball tournament niadtong Huwebes sa gabii didto sa Garden Bloom open court sa Pitogo, Consolacion.
Gumikan niini, harungon sa 2GO/Beryong ang topseed nga UPS/Wally nga nakasud sab sa finals human midaog pinaagi sa forfeiture batok sa walay daog-daog nga LBC/Daru.
Ang UPS/Wally miabante sa finals bitbit ang 4-0 nga baraha, samtang ang 2GO/Beryong nagbawon og 3-1 record.
Si Allan Abrasado maoy nangu sa kadaugan pinaagi sa iyang 25 puntos, si Tamtam Sanchez miabuno’g 22 puntos, samtang sila si Gary Rojas ug Beryong P. mitampo’g 15 ug 13 puntos.
Ang natagak nga DHL/Nonoy gipangulohan sab ni Nonoy Sajot, kinsa miariya’g 24 puntos, gisundan ni Aljerou Juanillo sa iyang 16 puntos ug R.R. Demecillo nga adunay 14 puntos.
Sila si Joel Pitogo ug Clark Monsanto miamot og 10 puntos matag usa.
Ang 2GO/Beryong-UPS/Wally titular showdown himuon ugma sa gabii didto gihapon sa Garden Bloom.
Ang liga gipaluyohan sa Geobert Merchandise nga gipanag-iya ni Onesimo ‘Geobert’ Sajot. (BANAT NEWS)
PUNTOS MATAG USA
2GO/BERYONG (85) – Allan A. 25, Tamtam S. 22, Gary R. 15, Beryong P. 13, Akie 6, Dave M. 4.
DHL/NONOY (74) – Nonoy S. 24, Aljerou J. 16, R.R. 14, Joel P. 10, Clark M. 10.