CEBU, Philippines - Sangko sa langit ang kalipay sa Orlmon Video ni team owner ug playing coach Rolando ‘Lando’ Mondarte human sila mikampiyon pag-usab pinaagi sa pagpilde sa Carkiena, 84-77 sa finals sa VIMBRA-sponsored 3rd Consolacion Barkadahan Basketball League (CBBL) cagefest didto sa Barangay Pulpogan gym sa Consolacion.
Ang Orlmon Video, ang kampiyon sa first season sa miaging tuig gipangulohan ni Harold Javier, kinsa mipabuhagay og 23 puntos. Nakakuha sab siya og lapad nga suporta gikan nilang Cyril Sabellana ug Yves Aligway nga mikumbati’g maayo sa tunga-tungang bahin sa third hangtod na sa final quarter.
Biya pirme ang Orlmon Video gikan sa pagsugod ug diha na kini makatilaw og labaw sa nahabiling mga segundos sa third period, 58-57 sa free throws ni Sabellana. Napun-an pa kini og singko puntos ni Sabellana aron tapuson ang maong kuwarter sa iskor nga 63-57 ug wala na kini mohatag pa’g higayon sa Carkiena nga molabaw pag-usab. Ang Carkiena nilabaw og 12 puntos sa first quarter, 22-10 sa kombinasyon nilang Marchin Rojas ug Yanskee Capao. Miburot pa kini ngadto sa 16 puntos sa ‘back-to’back’ triples ni Gary Rojas, 41-25 sa second quarter. Apan hinay-hinay nga nahilis ang labaw ug mibalitok ang pabor ngadto sa Orlmon Video.
Si Marchin maoy topscorer sa Carkiena sa iyang 21 puntos, gisundan ni Yanskee nga adunay 17 puntos, samtang si Aljero Juanillo mitikdol og 10 puntos.
Ang liga nagmalampuson tungod sa suporta nga gibubo sa Erika’s Delight Bakeshop ug sa Rich Banana Catsup. Nagmalampuson sab kini tungod sa paningkamot ni league organizer Eduard Escorial ug sa iyang kaabag nga silang Noel Calo, Cresente Pilapil, Yanie Apas ug Kenneth Tagalog sa VIMBRA ug ingon man ni Rey Cortes.
PUNTOS MATAG USA
ORLMON VIDEO (84) – Javier 23, Sabellana 22, Aligway 18, Comiso 8, Ker. Quitay 4, O. Mondarte 4, Kier Quitay 2, Aligway 2, J. Quitay 1.
CARKIENA (77) – M. Rojas 21, Capao 17, Juanillo 10, Ayesha 6, Sanchez 6, G. Rojas 6, Sanchez 6, Blair 5, Bragas 4, Luis Andrei 3, Abrasado 3. (BANAT PALARO)