CEBU, Philippines - Ang All-Star MVP nga si Russell Westbrook mipadahunog og 34 puntos uban sa iyang 10 ka assists aron baswaton ang Oklahoma City Thunder ngadto sa 104-89 nga kadaugan batok sa Dallas Mavericks sa pagbalik sa aksiyon sa NBA kagahapon didto sa Chesapeake Arena sa Oklahoma City.
Si Serge Ibaka miamot og 21 puntos uban ang career-high 22 ka rebounds, samtang ang reserve guard nga si Anthony Morrow miabuno’g 16 puntos alang sa Thunder, kinsa midaog na’g unom sa ilang pito ka duwa.
Tungod sa maong kadaugan, ang Thunder mikatkat na ngadto sa ikawalong puwesto sa West ug nagtabla sa Phoenix Suns alang sa playoff slot.
Si Kevin Durant igo lang miamot og 12 puntos sud sa 37 minutos niya nga pagduwa.
Si Dirk Nowitzki maoy nangu sa Mavs sa iyang 14 puntos, samtang si Tyson Chandler adunay 10 puntos ug 13 ka rebounds.
Ang duha ka sagunson nga baskets ni Morrow maoy naghatag sa Thunder og 52-36 nga labaw sa first half.
Napugngan sa Thunder ang Mavs ngadto lang sa 29 porsiyento nga field shooting sa wala pa ang halftime ug nakapugos og 13 ka turnovers.
Daan nang may 26 puntos si Westbrook ug may siyam ka assists paghuman sa third quarter diin labaw ang Thunder, 83-65.
Nakasikit ang Dallas ngadto sa 10 puntos nga biya human sa basket ni Al Faruq-Aminu sa sayong bahin sa fourth quarter, apan wala sila molampos sa ilang rally.