CEBU, Philippines – Gipasulod ni import Josh Davis ang iyang floater sa katapusang uno segundo sa duwa aron ihatud ang Meralco Bolts sa ikalima nilang sunod-sunod nga daog batok sa GlobalPort Batang Pier, 86-84 kagahapon didto sa SM Mall of Asia Arena.
Gawas sa iyang game-winner, si Davis mirehistro usab og 33 puntos uban ang 25 ka rebounds alang sa Meralco nga misakmit sa solong liderato sa standing.
Nanimaho untang overtime dihang natabla ni GlobalPort guard Ronjay Buenafe ang duwa, 84-all, sa iyang tres sa nahibiling dos segundos.
Apan human sa gitawag nga timeout, si Davis isug nga midaro sa depensa sa Batang Pier aron mapasud ang iyang tira.
Si Davis nakakuha og suporta gikan ni Gilas Pilipinas cager Gary David kinsa adunay 22 puntos. Si Mike Cortez mitampo usab og 10 puntos.
Sa ilang bahin, ang GlobalPort nga nakahiagum sa ilang ikatulong pilde sa lima ka duwa gibidahan sa bag-o nilang import nga si Calvin Warner nga adunay 24 puntos ug 16 ka rebounds. (BANAT NEWS)