CEBU, Philippines – Padayonon sa Meralco Bolts ang maayo nilang sinugdanan sa conference pinaagi sa pagposte og 4-0 nga baraha batok sa Rain or Shine Elasto Painters sa PBA Commissioner’s Cup karong adlawa didto sa Smart Araneta Coliseum.
Ang Bolts makigharong sa Elasto Painters (2-1) nga sugdan sa alas-4:15 sa hapon.
Ang Meralco wala damha nga mag-una karon sa standing sa ilang 3-0 win-loss record ug gusto nilang palig-unon pa ilang pagkupot sa No. 1 seed sa standing. Ang Bolts nagsawo sa unang dapit uban sa Purefoods Star Hotshots ug Barako Bull Energy Cola.
Si coach Norman Black miingon nga nalipay siya sa gipakitang teamwork sa iyang koponan nga wala magsalig sa ilang import.
Sa miaging duwa, si Meralco import Josh Davis igo lang miiskor og otso puntos, apan midaog gihapon sila batok sa Talk N’ Text Tropang Texters dihang namuntos ang mga lokal sama nila ni Gary David, Cliff Hodge ug Mike Cortez.
Sa main game sa alas-7 sa gabii, ang Alaska Aces (1-1) tuyo nga mosakmit sa ikaduha nilang sunod sunod nga daog batok sa GlobalPort Batang Pier. (BANAT NEWS)