DAVAO CITY, Philippines – Tulo ka Mexican boxers ang misaad og daog batok sa tagsa-tagsa nila ka mga kaatbang gikan sa ALA Gym sa “Pinoy Pride 29: Fists of Fury” fight card karong Sabado sa gabii didto sa University of South Eastern Philippines gym.
Mangulo sa mga Mexican mao si kanhi Mexican Pacific Coast champion Cesar ‘El Dolar’ Chavez (23-7, 11KOs) nga kompiyansang molangkat sa WBO International junior welterweight title ni Jason ‘El Nino’ Pagara (34-2, 21KOs) sa main event.
“I will bring the belt to Mexico. I am positive of that,” matud pa ni Chavez atol sa final press conference kagahapon didto sa Royal Mandaya Hotel.
Kompiyansasi Chavez nga makahimo og laing upset nga kadaugan sa iyang kababayan nga si Jose Ramirez, kinsa mipakurat sa mga Davao fans tulo ka tuig na ang milabay human niya pildiha si ALA star Rey ‘Boom Boom’ Bautista sa labing unang Pinoy Pride card sa maong dapit.
Sama ni Chavez, si Juan Luis ‘Perla Negra’ Hernandez (17-3, 9KOs) masaligon sab nga modaog batok ni WBO ranked No.1 ug defending WBO Intercontinental super bantamweight champion Genesis ‘Azucal’ Servania (25-0, 11KOs) sa supporting main event.
"In Mexico, in Philippines or everywhere I fight, I always make sure that I am victorious and that’s what will happen on Saturday night,” matud pa niya. "I know that I will win and in fact, I am already thinking about giving (Servania) a rematch."
Sa iyang bahin ang kanhi Mexican world champion nga si Julio Cesar ‘Pingo’ Miranda (38-11, 29KOs) buot sab nga mabuhi iyang karera pinaagi sa pagpukan ni ALA flyweight ‘King’ Arthur Villanueva (26-0, 14KOs).
Si ALA Promotions President ug CEO Michael Aldeguer miangkon nga dakung sugal sa ilang bahin ang pagparang sa iyang mga world title prospects batok sa mga banggiitang Mexican boxers, apan gituyo nila kini aron masukod gyud ang abilidad ug kahigayonan sa mga ALA Boys alang sa mas dagkung sangka sa umaabot.
Sa undercards, si ALA rising star Mark ‘Magnifico’ Magsayo (9-0, KOs) mosukod sa abilidad ni veteran Thai nga si Sukkasem Kietyongyuth (13-3, 8KOs), samtang si Arjan ‘Spartan’ Canillas (9-0-2, 7KOs) makigbinukbukay ni Indonesian Stevi Ongen Ferdinandus (15-7, 8KOs). (BANAT PALARO)