CEBU, Philippines – Ang Samahang Basketbol ng Pilipinas (SBP) mihatag og dugang responsibilidad ngadto sa bag-ong natudlong coach sa Gilas Pilipinas nga si Tab Baldwin.
Si Baldwin nga maoy mihulip ni coach Chot Reyes gilauman nga mogiya sa Gilas ngadto sa Olympics sa 2016 pinaagi sa FIBA Asia qualifying karong tuiga didto sa Hunan, China sa Septiyembre.
Gawas niini, si Baldwin na sab ang gitugyanan nga mo-coach sa Philippine Team sa 28th Southeast Asian Games sa Hunyo.
Ang Pilipinas nga bidahan sa mga Gilas Pilipinas cadets sama nila ni Kiefer Ravena, Bobby Ray Parks Jr. ug Garvo Lanete uban sa mga piniling basketbolista sa PBA ug naturalized center nga si Marcus Douthit maoy numero unong contender alang sa gold medal.
Ang Pilipinas makigsangka sa ubang basketball team gikan sa mga silingang nasud nga naglakip sa Indonesia, Malaysia, Thailand, Vietnam ug Singapore.
Human sa SEA Games, ang Gilas mangandam dayon sa ilang pagsalmot sa William Jones Cup didto sa Taiwan sa Hulyo.
Ang kanhi Brooklyn Nets center nga si Andray Blatche, kinsa mitabang sa Gilas atol sa FIBA World Cup mobalik uban sa Philippine Team alang sa FIBA qualifiers. (LPM gikan sa Philstar.com) (BANAT NEWS)