CEBU, Philippines - Ang Team Bacalso maoy kasamtangang nagkupot sa liderato human sa duha ka hugna nga aksiyon sa 3rd Philippine Institute of Certified Public Accountants (PICPA)-Cebu Sinulog Open Chess Tournament kagahapon didto sa Deep Blue 'd Woodpushers Chess Club sa SM City-Cebu.
Gilangkuban nilang Edcel Montoya, Bonn Tibod, Bryle Arellano ug Jimmy Bacalso, ang Team Bacalso miposte og 4-0 nga daog batok sa Barracks nilang NM Leonardo Alidani, Jerish Velarde ug Peterson Sia ug dayon nakatabla, 2-2, batok sa Chess Masters nilang NM Merben Roque, Richard Natividad, Michael Pagaran ug Carlo Maraat aron pagpupo og 6.0 puntos nga maoy labing taas ning 9-round Swiss system competition.
Sikit nga anaa sa ikaduha nga puwesto bitbit ang 5.5 puntos mao ang Team Gypsy nilang FIDE Master Anthony Makinano, Voltaire Sevillano, Ronald Ganzon ug Vincent Balena.
Nahimutang sa ikatulong dapit ang HLO-DPWH nilang Rommel Ganzon, Alan Salientes, Joey Ardiente ug Tony Cabibil dala ang 5 puntos. (BANAT NEWS)