CEBU, Philippines – Pakyas ang ERCO BRO pagsakmit sa men’s open title, apan aduna gihapon kini ikapasigarbo kay nidaog sila og duha ka titulo sa 5th Sinulog Football Festival dili pa dugay didto sa San Roque Parish field sa barangay Subangdaku, Mandaue City.
Ang ERCO ni coach Glenn Ramos milangkat og korona sa ladies open human sa ilang kadaugan batok sa St. Monica FC, 1-0 sa finals. Ang ikaduha nilang titulo nadaog pinaagi sa pagpilde sa San Roque FC sa penalty shootout, 2-1 sa 38-above final.
Sa men’s open final, ang ERCO-BRO napilde ngadto sa Rising Sun, 2-1.
Sa laing bahin, ang Timex ug San Miguel FC parehong nagbitbit og championship trophy.
Ang San Miguel naghari sa inter-company division human midaog batok sa Leylam FC, 1-0, samtang ang Timex mipukan sa Lexmark FC, 1-0 aron masakmit ang inter-BPO title.
Sa sayo pa, ang Don Bosco Technology Center (DBTC) miugkat og duha ka titulo pinaagi sa under-9 ug under-11 divisions.
Ang lain pang age-group winners naglakip sa Paref-Springdale (boys 18), University of San Carlos-BED (boys under-13), Sacred Heart School-Ateneo de Cebu (boys 15), Tabor Hills (girls 15) ug St. Theresa’s College-Team B (girls 18). (BANAT NEWS)