CEBU, Philippines – Human sa pipila ka semana nga pahuway, ang aksiyon sa Power Dealer Basketball Club (PDBC) Christmas League 2014 mobalik na sab karong gabii diha sa Kimwa gym sa barangay Subangdaku, Mandaue City.
Ang solo-leader nga Kimwa squad, kinsa wala pay pilde sud sa unom nila ka duwa, laraw nga mokulit og daog batok sa Gold Muscle Gym sa katapusan nilang duwa sa eliminasyon.
Sa kasamtangan, ang Kimwa nagbitbit og 6-0 nga baraha, samtang ang Gold Muscle Gym ni team owner Edmund Espina adunay 2-2 nga win-loss record.
Ang Kimwa magsalig sa tandem nilang Sheldon Gahi ug Weldy Soco nga mogiya sa ilang opensa.
Ang Gold Muscle Gym sa ilang bahin, magsandig sab sa troika nilang Jason Castro, Romar Suaro ug Bryan Santome.
Sa pasiunang duwa nga gitakda sa alas-7:30 sa gabii, ang Unilink Shipping (3-2) makigsangka sa Toyota (2-1), samtang sa main game sa alas-9:30 sa gabii, ang MSE (0-4) makigbatok sa Flying-V (1-4). (BANAT NEWS)