CEBU, Philippines – Alang sa ubang fans, naghatag og kalingawan si Calvin Abueva sa PBA ilabi na kadtong mahiligon sa hugaw o "dirty play" ug niadtong gusto nga adunay player nga manukmag ngadto sa laing player sa walay igong hinungdan.
Gisukmag ni Abueva ang player sa Rain or Shine nga si Jonathan Uyloan sa iyang tiyan ug natumba ang nauwahi nga nagping-it sa kasakit.
Sa maong duwa, na-ejected si Abueva tungod sa Flagrant 2 foul ug milakaw balik sa ilang bench nga nagpahiyom nga daw naka-anugon nganong wala niya kusga pagsukmag.
Sa iyang hitsura, tataw nga wala magbasol sa iyang gibuhat si Abueva ug daw walay angay mangayo og pasaylo sa iyang gihimo.
Wala sila magkainitay o magkalalis ni Uyloan bisan na lang unta dunay trash talk nga nahitabo tali kanilang duha ug daw sa giganahan lang gyud siyang mihimo niadto posible nga may wala hibaw-i nga espiritu nga maoy rason nganong iya kadtong nahimo.
Ang PBA commissioner nga si Chito Salud mipahamtang og multa kang Abueva nga 20 mil pesos apan wala siya masuspenso.
Lahi sa kaso kang coach Yeng Guiao nga igo lang niyang gisaway ang officiating, mas dako siya'g multa. (GGM) (BANAT NEWS)