CEBU, Philippines – Nakatabla ang Rain or Shine Elasto Painters, 1-1 dihang yano kining mibawos og daog batok sa Alaska Aces, 102-95 sa Game-2 sa ilang “best-of-seven” semifinals series sa PBA Philippine Cup kagabii didto sa Mall of Asia Arena.
Si Jervy Cruz mitimbre’g 19 puntos ug milangkat og 12 ka rebounds, samtang ang rookie nga si Jonathan Uyloan miduga’g 18 puntos alang sa Painters, kinsa miabante og 19 puntos sa first half, 55-36 ug gikan didto wala nila hatagi’g higayon ang Aces nga moilog sa momentum.
Laing mihimo’g double figures sa Rain or Shine mao si Gabe Norwood sa iyang 15 puntos, samtang si Paul Lee miamot og 13 puntos.
Ang Alaska misikit, 89-85 sa nahabiling sayes minutos sa third period, apan mao na kini ang labing hayag nilang kahigayonan nga mailog ang daog dihang mi-rally ang Painters aron makuha ang daog.
Ang veteran nga si Erik Menk maoy nangulo sa Aces sa iyang 18 puntos, samtang ang forward nga si Vic Manuel adunay 17 puntos. Si Sonny Thoss, kinsa maoy nangulo sa Alaska sa Game- 1 nalimitahan lang ngadto sa tres puntos. (BANAT NEWS)