CEBU, Philippines - Usa na lang ka daog ang gikinahanglan sa Kimwa aron maharos nila ang elimination round sa Power Dealer Basketball Club (PDBC) Christmas League 2014.
Hinuon, ang Kimwa segurado na moduwa sa finals human nila gilubong ang Toyota, 89-57 niadtong Miyerkules sa gabii diha sa Kimwa gym sa Brgy. Subangdaku, dakbayan sa Mandaue.
Gipangulohan ni Sheldon Gahi ang Kimwa nga mikamada og 13 puntos, samtang laing duha niya ka teammates ang miiskor sab og double figures.
Sa kasamtangan, ang Kimwa nagbitbit karon og limpiyong 6-0 nga baraha.
Ang Toyota nga adunay 2-1 win-loss record gipangulohan ni Jason Molde, kinsa miratsada’g 18 puntos, gisundan ni Matthew Parker sa iyang 10 puntos.
Sa laing aksiyon, ang Unilink Shipping mieskala sa ikatulong daog pinaagi sab sa paglubong sa Woop, 65-54.
Si Lemuel Apas maoy mitimon sa Unilink Shipping nga miariya og 12 puntos.
Abante ang Unilink Shipping og 13 puntos sa first quarter, 27-14, apan mihinay-hinay kini’g kaunlod ug miabot na lang sa kuwatro puntos, 32-28 sa halftime human sa three-pointer ni John Dale Ybañez. Apan didto ra kutob ang maayo nilang labok tungod kay ang Unilink Shipping ubos sa liderato ni Apas misukli’g mga puntos aron inaton og balik ang labaw.
Si Greg Aguilar Jr. maoy topscorer sa wala pay daog nga Woop pinaagi sa iyang 19 puntos, samtang si Ybañez adunay otso puntos ug laing bigman nga si Philip Khan Lim miamot og sayes puntos.
Sa lain pang duwa, ang Gold Muscle Gym ni Edmund Espina mipukan sa mas dagku nga MSE, 66-57 alang sa ilang 2-2 nga baraha.
Si Bryan Santome miwadwad og maayo aron pangulohan ang undermanned nga Gold Muscle Gym.
Ang MSE gipangulohan sab ni Edwin Dejacto Jr. pinaagi sa iyang 20 puntos, gisundan ni Carlo Mepaña nga adunay 11 puntos.
Ang MSE wala sab katilaw og daog sa upat nila ka duwa ning maong liga nga gipaluyohan sa Saymer Merchandise ni PDBC president Florentino Sayson.
Ang mga duwa gidumala nila ni PDBC founder Arnold de Asis ug league organizer Alner Mercado uban nilang Louie Canen, Nestor Sullano, Edward Escorial ug Yanie Apas sa VIMBRA. (BANAT NEWS)