CEBU, Philippines - Miiskor sa ilang ikatulong sunod-sunod nga daog ang Lorega Echavez Youth Council (LEYC) pinaagi sa pagpilde sa Lorega Sitio Camansi Organization (LSCO), 40-37 sa mini division sa Inter-Color Lorega Echavez Youth Council Sinulog Cup 2015 basketball tournament didto sa Barangay Lorega gym, ning siyudad.
Ang three-pointer ni Patrick Del Castillo sa katapusang 12 segundos maoy mipadaog sa LEYC. Si Del Castillo miiskor og 13 puntos, apan si Josephus Sandico maoy topscorer sa kadaugan pinaagi sa iyang 19 puntos.
Sa lain pang mga duwa, ang San Miguel Cliques midaog dayon sa una nilang duwa human ilang gipilde ang Gawad Kalinga Phantom sa iskor nga 29-23. Midaog sab ang LPYO pinaagi sa paglubong sa CCO sa iskor nga 35-19. (BANAT NEWS)