CEBU, Philippines – Mosaka og timbang si kanhi Filipino world champion Johnriel ‘Quadro Alas’ Casimero (20-2, 12KOs) aron sugdan iyang misyon alang sa laing world title.
Si Casimero makigsangka ni Mexican Armando ‘Cobra’ Santos (14-3, 8KOs) sa usa ka IBF flyweight title eliminator karong Domingo didto sa Pachuca Hidalgo sa Mexico.
Ang modaog tali sa duwa makakuha og mandatory shot alang sa IBF flyweight title nga kasamtangang gihuptan ni Thai Amnat Ruenroeng.
“Gusto gyud ko mahimong world champion pagbalik,” matud pa ni Casimero nga atua na karon sa Los Angeles pangandam sa iyang away.
“Nibalhin ko og training didto sa Manila ug nindot akong ensayo didto.”
Gusto na nga kalimtan ni Casimero, 25-anyos ang sakit nga panghitabo diin nahanaw ang iyang IBF light flyweight title human mapakyas pagkuha sa 108 lbs. weight limit niadtong Mayo.
Gipahimungtan hinuon ni Casimero ang iya untang challenger nga si Colombian Mauricio Fuentes kinsa iyang gipatumba didto sa Waterfront Cebu City Hotel and Casino.
“Dili ko mosaad og knockout aning awaya, pero ako gyud ipakita ang tanan aron makahimo og og impressive nga win.” (BANAT NEWS)