CEBU, Philippines – Nakatilaw na usab og laing sakit nga kapildehan ang Kia Sorento human sila gilatos sa NLEX Road Warriors, 88-80, kagahapon sa PBA Philippine Cup didto sa Smart Araneta Coliseum.
Ang veteran center sa NLEX nga si Asi Taulava mirehistro og double-double 19 puntos ug 14 ka rebounds, samtang si KG Canaleta midugang og 16 puntos .
Sa maong kadaugan, ang NLEX misaka sa record nga 4-7 nga nahimo nilang pasaporte aron musulod sa quarterfinals.
Ang Kia miduwa nga wala ilang playing coach nga si Pinoy boxing icon Manny Pacquiao kinsa wala kalarga gikan sa General Santos City tungod sa bagyong ‘Ruby’.
Sa katapusan nilang duwa, si Reil Cervantes mipabuto og 34 puntos, apan dili kini igo aron hatagan ang Kia sa ikaduhang daog. Ang Kia manamilit sa Philippine Cup nga adunay 1-10 win-loss record.
Nakatabla ang Kia, 77-all sa katapusang tres minutos, apan kini ang katapusang higayun nga nakaduol ang koponan ni Pacquiao human giligsan na sila sa NLEX hangtud sa katapusang bagting sa buzzer. (BANAT NEWS)