CEBU, Philippines - Laing Guinness World Record ang nabuak sa mga Sugbuanong atleta human sa malampusong Kick for Life diin nahimo sa Cebu Karabaws ang labing dugay nga football marathon.
Taliwala sa pag-abot sa bagyong Ruby kagahapon dinhi sa nasud, ang mga Cebuano football players mibuak sa karaang rekord sa United Kingdom nga 72 hours diin wala sila’y hunong nga nagduwa og football sud sa 73 oras.
Una nang nakab-ot sa Cebu ang duha ka Guinness World Records – ‘Largest Archery Class’ ug ‘Largest Archery Tournament’ sa miaging buwan, samtang ang Sugbo usab ang nagkupot
sa ‘Largest Zumba Class’.
Gawas pa niini, ang Sugbo na usab ang GWR holder sa ‘Largest Chess Tournament’ ug ‘Biggest Dance Class’.
Ang maong football world record didto himoa sa Mandaue City ug makaangkon na sila og kaugalingon nilang Guinness World Record human sila mapakyas sa ilang tinguha pag-angkon og rekord sa ‘Largest Local Delicacy’ diin bibingka ang giluto nila.
Dili sama sa mga miaging GWR sa Cebu, ang football marathon gisalmutan lang og 60 ka mga players nga mikunhod ngadto sa 36 ka buok sulod sa lima ka adlaw nga walay hunong nga pagduwa’g football.
Ang mga organizers ug players dili pa hinuon mohunong og duwa tungod kay human mabuak ang 72 hours nga rekord sa UK, laraw nila nga moabot hangtod sa 101 hours.
Gawas sa pagkab-ot sa Guinness World Record, ang maong football event gihimo usab isip awareness campaign alang sa mga adunay congenital heart defects. (BANAT NEWS)