CEBU, Philippines - Nakatilaw na gyud og daog sud sa tulo ka duwa ang Unilink Shipping pinaagi sa paglubong sa Flying-V, 57-42 sa nagkainit nga aksiyon sa Power Dealer Basketball Club (PDBC) Christmas League 2014 niadtong Miyerkules sa gabii diha sa Kimwa gym sa barangay Subangdaku, Mandaue City.
Tulo ka players ang miiskor og double figures alang sa Unilink Shipping sa pagpangulo ni Marsdell Esguerra, kinsa miariya og 12 puntos.
Ang Unilink Shipping nabiyaan sa first quarter, apan nakabawi kini sa mosunod nga mga kuwarter aron masakmit ang una nilang daog ning maong liga nga gipaluyohan sa Saymer Merchandise ni PDBC president Florentino Sayson.
Si Alvin Cabiluna miambit og 11 puntos, samtang si Lemuel Apas mibundak og 10 puntos alang sa Unilink Shipping nga kasamtangang nagbitbit og 1-2 nga baraha.
Sa pikas bahin, si Obeña lang ang nakahimo’g double figures alang sa 1-3 nga Flying-V nga mitubil og 14 puntos.
Sa laing aksiyon, ang Kimwa squad mikulit sa ikaupat nilang sunod-sunod nga daog human sab nila gilubong ang Woop, 81-51.
Sa gilauman, si Sheldon Gahi mao gihapon ang topscorer sa Kimwa nga miayag og 12 puntos. Laing duha niya ka teammates ang miiskor sab og double figures alang sa Kimwa nga adunay 4-0 win-loss record.
Ang Woop nga mao na lang ang koponan nga wala pa makatilaw og daog gipangulohan ni Kenneth Roy Monteroyo pinaagi sa iyang 26 puntos, apan nausik lang ang iyang mga paningkamot kay kulang siya’g suporta gikan sa iyang kaubanan. Si John Dale Ybañez mitampo’g 11 puntos.
Ang mga duwa gidumala nilang Arnold de Asis ug Alner Mercado uban nilang Edward Escorial, Marlon Espante ug Kenneth Tagalog. (BANAT PALARO)